کراچی میں لڑکی کو کوئی خطرہ نہیں ،سندھ ہائیکورٹ کا دعا زہرا کو کراچی منتقل کرنے کا حکم

 

کراچی(ویب ڈیسک )سندھ ہائیکورٹ نے کراچی سے لاپتہ ہونے والی دعا ذہرا  کو لاہور سے کراچی منتقل کرنے کا حکم دے دیا ہے ۔ 

نجی ٹی وی" جیو نیوز "کے مطابق سندھ پولیس نے دعا زہرا کے شوہر ظہیر احمد کو عدالت میں پیش کیا جہاں جسٹس اقبال کلہوڑو کی سربراہی  میں 2رکنی بینچ نے درخواست پر سماعت کی،دورانِ سماعت جسٹس اقبال کلہوڑو نے کہا کہ لڑکی کو تو ہر صورت کراچی لانا ہے، جرم کراچی میں ہوا ہے توکیس کی سماعت بھی کراچی میں ہوگی، کراچی میں بھی شیلٹر ہوم ہیں یہاں لڑکی کو کوئی خطرہ نہیں ہوگا، کراچی کے شیلٹرہوم میں بھی حفاظتی انتظامات ہوں گے، 

عدالت نے ملزم ظہیر کے وکیل سے مکالمہ کیا کہ آپ چاہتے ہیں لڑکی کو کراچی منتقل نہ کیا جائے؟ اس پر ملزم کے وکیل نے کہا کہ لڑکی کوکراچی منتقل نہیں کیا جاسکتا، لڑکی اگرکسی سے نہ ملنا چاہے توبھی کوئی اس سے نہیں مل سکتا، عدالت بھی چاہے تو لڑکی سے ملنے کا نہیں کہہ سکتی۔ 

وکیل کے دلائل پر عدالت نے کہا کہ لڑکی کم عمر ثابت ہوچکی ہے، اس کے بیان کی کوئی اہمیت نہیں، ہم لڑکی کی کسٹڈی والدین کے حوالے کرنے کا حکم نہیں دے رہے،دورانِ سماعت سندھ اور وفاقی حکومت کے وکلا ءنے بھی دعا زہرا کو کراچی منتقل کرنے کی حمایت کردی جس پر عدالت نے لڑکی کی بازیابی کی درخواست پر فیصلہ محفوظ کرلیا جسے بعد ازاں سناتے ہوئے دعا زہرا کی کراچی منتقلی کا حکم دے دیا۔ 

واضح رہے کہ دعا زہر ا نے کچھ روز قبل لاہور کی مقامی عدالت میں درخواست دی تھی کہ ان کے شوہر کے ساتھ تعلقات ٹھیک نہیں چل رہے اور والدین کی جانب سے بھی خطرناک نتائج کی دھمکیاں مل رہی ہیں اس لیے دارالامان جانا چاہتی ہوں جس پر عدالت نے ان کی درخواست منظور کرتے ہوئے دارالامان بھیج دیا تھا

SHARE THIS

Copy Url